Сюймекликден, эшилгенча, къанатла битдире, джюрегиме джылыу берген, татлы сёз- юйюм..
Арбазгъа чыгъыб, джашил хансчыкъгъа таянсам, гокка хансланы ариу хауаларын солуй, кёкде учхан къанатлыла бла бир тилде сёлешгенча, бир бирибизни ангылагъанча кёрюнеди кёзюме.
Тёгерекге къараб, тансыкълай сабий кюнле эсге тюше, эки аякълы арбам чардакъдан къыйыры кёрюне. «Эсингдемидиди, ненча кере менден джыгъылыб тобугъунгу сыдыргъан эдинг?» дейди.
О.. къалай унутурма ол сагъышсыз сабий заманланы? Къуйрукъчугъунда къалач буруб, аякъ артха къалмай, бизни бла тенгликге чабыб айланыучу, сюйген кючюкчюгюм Кутя..
Ол заманланы сатыб алыр мадар болмагъананына, ёмюрге кетгенине джюрегим мыдах болса да, сагъышларымы ариу макъам бёледи. Ол макъам къаныма кириб, джюрегими тынчлыкъ басыб, бир бири изындан кетген джылла эсиме тюше, чегетни теренине киргенча, кёз аллыма тюрлю-тюрлю сыфатла келиб сюеледиле. Мен да ол ариу макъам бла ийген абезек тебсей кёлюм учунуб, аякъларым джерге тиймей бир дженгиллик сынайма…
Тынчлыгъымы дагъыда бир зат бузады: сабий заманымда ангым бла бу замандагъы бир бирине келишмегени. Сабийликде къуандыргъан затла бюгюн сусабынгы къандырмагъаны сейир тюлмюдю? Кёб затлагъа разы болмай, джанынгы къыйнай, санынг инджиле… Бюгюнлюкде аны эсге тюшюре къаныма сингиб бошагъан макъамла джюрекни ойната, ана джылыууча санларымы джумушакъ сылайды.
Биринчи сюймеклик.. Эсге тюшюре, акъырын аны эшикни ачама… Аны джарыкълыгъындан, кюн кёзюме ургъанча сокъур болургъа аз къалама.. Кечеле.. Сюймекликге аталгъан, учсуз, къыйысыз джукъусуз кечеле..
Ол насыбха батылыб, ариу хауасын джуртланыб солуй, джюрегим бла къысха тебсеуге берилеме…
«Огай, кетме ол заман» деб къычырсам да, къарыу эталмайма заманнга.
Заман бла биргелей атларгъа керек болгъанын ангылай: «кесинги хорлатма сагъышлагъа, эй, хомух» дей, ёрге туруб, кесиме уллу база, сюймеклик бла джылыудан эшилген юйюме насыб джюгенден тутуб киреме. Алай а.. юйде да эсге тюшюрюр зат азмыды..
Бизни къоюб, ёмюрлеге кетген сюйген адамларым.. Къабыргъада тагъылгъан суратларына къараб тансыкълайма…
Сынама.. Бери айланыб табхада ариу тизилиб тургъан эришмекликден махтау къагъытла.. Анда да джашаудача бир мийикге чыкъгъаным, бир да хорлаялмай сынганым.. Тамам джашауну шартлары.. Огъай..Огъай..Огъай..Болду…
Сындым ………………
Ангыладым кесими…
Энди къояйым… Кеб кере джыгъылыб, мийикге чыкъдым… Ийнанмакълыкъгъа энтда барды къарыуум…
Джангур джауаргъамы башладымы? Къуйрукъчугъун булгъай кючюкчюгюм кёзюме ышангылы къарайды… Былай кел, Кутя, сени кёзчюклерингде да кёреме ол Ийнанмакълыкъны!