Бошбоюнлукъ.. Бек татлы сёз.. Алай а.. Къайдам..
Талай сагъатны кесинги бошлукъгъа берирге керек болур, аны ангыларча. Неди ол..? Эринчеклик?.. Огъесе кесинги сагъышлагъа хорлатыб, бир абына, бир къоба, ангылаб къоялмагъан макъамны ызындан сюре, джангы муратла излей.. Заман ашыргъанмыды..? Сагъышла.. Эсге тюшюрюу.., эсде тутуу.. Кесинги анга бериу.. Не аманлыгъы барды аны?
Ол байлыкъгъа кесинги саулай бериб, сагъышлагъа бёлениб, аманмыды заманланы сюзген?
Артыкъсыз да Теберди ёзенни ариу хауасын солуй, талада олтуруб, кеси аллынга магъанасыз ышара, кюнню ариу сылагъанына бой бериб, табигъатны ариулугъу уа белляу айта..
Кёзаллынгда ётеди къазауатны ачы джыллары.. кёчкюнчюлюк.. миллетим сынагъан артыкълыкъ заманла.. Андан бери айланыб, эшитесе сабий тауушла.. кюлген сабий тауушла…
Заманланы орталарында айлана, акъсакъал къартларыбызны акъыллы оноуларын сюзе, баш иеме акъбаш ариу тауларыбызгъа. Къуру олмуду ариулукъ? Таулу къызланы ариулукълары, джерни юсюнде кимге белгисизди? Учхан къушдан тюк алгъан джашларыбыз, а? Къайсы бирин, къайда айтыб бошаргъа боллукъду..?
Сагъышланы теренине батылыб, кюнню батханы бла, ёзенледе чыракъланы джанганларын эсгермей къалдым..
Бу ариу белгили макъам неди..? Ёзенден ариу хауа бла бирге тишлик ийис уруб, анамы «къайдаса?» деген джумушакъ ауазы эсими бёлдю. Бу болурму насыбны бир шарты? Къайдам..
Бош боюнлукъ «бюгюнге башынга бошса» дейди. Арыгъанма..
Бош боюнлукъ - эринчеклик тюлду. Аны ангылагъанма.
Сагъатны ызына бурургъа керекди.. Гёбелеккелеча башынгдан къарангыгъа джангы сагъышла учуб чыгъадыла.. Неди бу оюнла..?
«Бюгюнге башынга бошса..»
О, къой, не билесе сен..?