Барх! ехъла гьуни. 10. 02. 2009д. 16с. 05мин

Цехлизирти х!янчира тамандарили сайра Малик гьаваличи дураухъун. Гъаглири. Папрусра бит!ак!или сайра кьукьаличи биуси дях!икад ватихьиб. Барх!и ахъилри. Ц!ябдешли бярг!ибси ц!удара к!ана закличи дямбуцилри. «Ишбарх!и кьанкайубра», - или пикриличил Малик гьалаклири. Ил унра шилизив х!ерирусири. Ила ваэс верх!ел-гех!ел километр дурги. Шимази башуси автобус ца сяг!ятра сера гьалаб арбякьири. Г!ур машина мажах!ят букьяши. «Гъамтачи хьуравиэс», - пикри бак!иб. Амма Пат!имат чераэс багьандан илини ганз хъярхъбариб. «Лип-лип» или багьлали кайгуси дях!ила ургаб бара чебиулри гьунила сипат. Х!ерк! тамай дях!или к!ап!барайчи Маликлис илала дубличи ваэс г!яг!нисири. Х!ерк!ла дуб буцили шилизи ваэс гьамадлири. Байхъу сяг!ятли илини халаси гьуни ахъиб – шурмала лут!мау ваиб. Бахъх!и агарли х!ерк!ра чебиу. Дугела ц!ябдешлизиб Лех!деш «гур» или буч!улри. Маликлис илкьяйда вашукад гьанарулри. Ургади т!ашизурли алавчар х!ерик!улри. Х!ера гьалабван х!ерк!ла т!ама бикьулри. «Гьанна чевх!елк!ас», - ибси пикриличил урши кункли вашулри. Цаургаб г!янц!-г!янц!ли тамашала т!ама бикьесбииб. Х!ера гьачам гьат!и. «Буц!и»,- пикри алкун бек!лизиб. «Чевях!си Аллагь, Кьудратла Вег!, тилади саби, жанивартазивад верцахъаба»,- шивк!ивухъун урши х!улбира закличи ахъдуцили сайра. Цулбира кьярждирули Малик къалабали вашулри. Х!ера бях!-бях!кад буц!ала х!енкь убях!ихъесбииб. Малик т!ашизур. Буц!ира т!ашдизур. Маликли г!уррара ганз гьалакбариб. Ца х!ябц!алицад ганзла г!елар буц!и, бургира г!яшдуцили сарира, цалис ца г!еларад дашулри. Илди дуг!ла хурачи мешулири, амма Маликли балулри хури авх!едик!ни. Эгер урехи чебаахъалли, хя чебулхъан. Уршили ил балулри. Илди пикрумазив левай буц! Тамай г!ердаиб. Уршини балулри жаниварти ц!ализирад урухк!ни. Кисалабад пирхик! бак!ахъили  пирхбарили бец!ла гьала лайбак!иб. Тамаша – илди г!еладях!дизур ва к!идаршцад ганз кац!айчи шишх!едухъун. Уршила урк!и разибиуб. Сих!рула пирхик! кисалаб лебниличи Аллагьлис балгни дариб. Ил урузк!ули ах!енри сай комсомолец виъни багьандан. Комсомолецли ил жяг!ял вирар. Гьанна биалли илис верцес г!яг!нисири – шел гушти бец! Чердиркули ах!енри. Х!ера г!урра вец!алцад ганзла гъамбиуб бец! Маликли пирхик! алкахъи бец!ла гьала лайбак!иб. Бец! тяйдибиуб. Урк!бухъунсин ил х!ербик!ули калун. Х!ерк!ла дуб буцили урши вашулри. Гьарахълар хут!ла шалми чедиулри. Ца вец!ну Шура минутала гьуни сабри  шилизи ваэс. Гьар замана буц!и ц!акьдик!улри. Илдала урехи бетахъилри, амма ц!ала х!урмат бирулри. «Гушдеш зизи ах!ен» бик!ни бархьа буили саби. Шилизи виух!ели чумал хя «гъям-гъям» или уршиличи садухъун. Маликли шилизирти лерилра хури далутири. Малик хурани вагьур ва ил алав т!ях!дик!есдииб. Ласвяхъили х!еръибх!ейс, бец!ла цалра къаралди аги. Аллагьла Иманничи уршила бирхауди гьат!иралра имц!абиуб.