Б У Т1 А КЬ Я Н Ч И Б И:
Х1яжи – г1улухъа.
Г1умар – Х1яжила дудеш.
Пат1имат – Х1яжила неш.
Сарат – унра рурси.
Ц А И Б И Л А Н Ц1 Б У КЬ
С у р а т ц а э с и л
Барх1ехъла замана Х1яжи унрубала къапулизи кьут1ик1ули сай.
Сарат Чи саю кьут1ик1уси?
Х1яжи Абхьа, рузи, ну сайрану.
Сарат Чи сайри х1у?
Х1яжи (разили) Сарат, х1егьурравгъари? Абхьагу ца г1яг1ни лебну.
Сарат (унза ибхьули) Гьа, х1у сайрив Х1яжи-ляжи? Сен вак1илри?
Х1яжи (ч1ябарличи х1ерик1ули) Гьи, рузи, верцахъаба.
Сарат (урк1рухъи) Се?
Х1яжи (къалабали) Ах1ен. Ах1ен… Кумекбара.
Сарат (тамашариубли) Се кумекбариша гьанна х1ед нуни?
Х1яжи Иргъулрив, рузи, ишбарх1и базарла бях1личиб пагьливанти лебри.
Сарат Лебри. Г1ур се биубли гьат1и?
Х1яжи Ну илдачи х1ерик1ес вякьунра.
Сарат Бег1лара г1ях1си барилри.
Х1яжи Гъайла къант1а, ну илдачи аъкахъили нушала маза деткахъахъира.
Сарат (пишряхъили) Агьа, гьанна биру х1ед диван х1ела дудешли. Чинар датурри илди?
Х1яжи (т1уй чебиахъули) Ик1 музала бях1лизир.
Сарат Гьа (бек1 гьак1бирули), г1ур сен набчи вак1илри? Нуни мага диг1и сари или гьанбиркулив х1ед?
Х1яжи (къалабали) Ах1ен. Ах1ен… Вари, илбагьандан ах1енра ну вак1ибси.
Сарат (пишряхъили) Г1ур се багьандан сайри?
Х1яжи Х1уни даладгу дила дудешла х1ял-т1абиг1ят?
Сарат Даллас, левг1ев г1ях1си адам сай.
Х1яжи (шайчи) Усух1ели кьац1 биха х1ейк1ар. (Ахъли) Сай, сай, амма ишбарх1и наб вайт1а дихьесгу или урухк1улра.
Сарат Г1е, вайт1а ибх1елира, вайт1а диркур.
Х1яжи (хумарли) Х1у иличи разисигъунаригу?
Сарат (пишряхъили) Г1ур се бариша нуни, рисмага рисишав? Х1уни сари деткахъахъибти, х1уни дарга – таман къуллукъ !
Х1яжи (гьигь батурли) Дург кьалли дургира, амма гьанна кьанни саби. Я… рузи, ца сек1ал барагу наб.
Сарат (тамашаличил) Се сек1ал?
Х1яжи х1ела х1евара к1анара дихагу набзи.
Сарат (тамашариубли) Се дирути илди х1ед? (Дукарругили) шерри укьес валкьаурли х1ейиши?
Х1яжи (хумарли) Датигу масхурти. Бархьли бурасли, гьанна нешли диъла чудни-хинк1и дирули сари. Ну дебали гушлира. Дудешли, маза х1едаргили укьясли, витили гьакархъура. Х1ела палтарличил укьясли, дудеш шакх1еркур. Жяг1ял, сенбиалра, маза дургис.
Сарат Агь, г1ямултар гурда! Агь, г1ямултар гурда! Уэн ишав, бусяг1ят лерхисну.
Сарат палтар хес хъули аркьян. Х1яжи сайцун.
Х1яжи (кани буцили) Агь, дила кани, изули лебрикьалли. Се бирутири итди пагьливантира, хъярчибира? Вайсирив гьанна г1явати чудни-хинк1ала к1абат1ла гьала кайили виаслири? (Гьимиличил) Сари жяргадиъ, селис г1яг1нити илди наб гьар барх1и дуки вашес?
Сарат палтар хили ляркьян.
Сарат Х1ера иш х1ева. Х1ера иш к1ана. Вари, жяг1ял чардара, школализи чегьес г1яг1нити сарину.
Х1яжи Баркалла, рузи, баркалла. (Сарат байрирули)Х1ябилра дариша.
Сарат (къужирули) Гьей! Гьей! Багьлавии!
Х1яжи (някъли михъири буцили) Черрерхи, рузи, разивиубдешли балуси агарану. Дила г1яг1ни барибх1ели, ирхъяйла мякьла кадирхьис. Г1янруч1 х1уни каса.
Сарат Г1ях1си.
Х1яжи Дуги г1ях1си бак1аб.
Сарат Аравираби.
Х1яжи барх1ехъла ц1ябдешлизив виц1ур.
С у р а т к1 и э с и л
Ц1яб-ц1ябси хъали. Столличиб напла чирагъ. Печьличиб руржуси чудни-хинк1ала шанг.
Г1умар Чех1ейулрив, хъямх1надваркь, гьаннара чарх1елхъули.
Пат1имат Х1уни дирхъу или х1якьули ургар.
Г1умар Дирхъис г1е, дирхъра ц1а дурадухъесли дирхъис. Куппаюгъли, пагьливантачи вякьи сай. Вег1ла мазайчир пагьливантала уюнти г1яг1нити дуили сари.
Пат1имат Гьу, лех1кахъи гьанна, биубси агарану. Жяг1ял дургу мазара…
Г1умар Ишдуги чинава ил?
Пат1имат Ургар чинав виалра балчала г1****изив. Селра х1ебирар, буг1ярли ах1ен. Ца дуги дураб берк1алра селра х1ебирар.
Г1умар Дураб дила уршили сен дуги бурк1уси?
Пат1имат Сенк1ун х1уни илис дирхъух1ели. Х1ела х1ял балух1ели х1ек1ибси сай ил ишдуги. Гьалавра деткахъили сари или хяла гули варили катади. Илбагьандан, духули, х1ек1или сай.
Г1умар х1ебиалли, х1ела гъай х1ясибли, ну – вайсира, х1ела их, бяркъх1ебяркъурси хяла кец1а, г1ях1си сай.
Пат1имат Их, бяркъх1ебяркъурси хяла кец1а, х1елара урши сай. Х1уни сай их улъуси.
Г1умар (тамашавиубли) Нуни?... Сен-сен?
Пат1имат Каникултала замана гьар барх1и дуки вашахъулри. Уршилис сегъуналра х1яз барес замана калули ах1ен.
Г1умар Х1ела пикрили, х1язли виркьули, акьули чарсайк1алли, г1ях1си бяркъ кайсув илини?
Пат1имат Ну ли рик1ули ах1енра.
Г1умар Г1ур се рик1улри?
Пат1имат урх1ла маза кьяйда яргализи каили, уршилис цабара акьуухъахъес замана беда. Х1ера, урцул кавдесалра х1ела замана агара. Х1яжи акьуси виаллири, илини наб кьадин урцул кавди, шин айхъи, г1яядури ушки…
Г1умар Палтар ици, кьац1-шин дири, хурег бири… Г1ях1си бяркъ х1ебиалли нешли жагькайруси уршилис бедлугуси. Эгер цалра масс беткахъалли, Х1яжицунах1енну, х1ура юртлизирад дураруршури.
Пат1имат Астахфируллагь! Астахфируллагь! Абдалвиублигу иш мурул ишдуги.
Кьут1ла т1ама.
Г1умар Х1ера, абхьа унза, г1ях1ял ургар лявкьулину.
Пат1имат (унза ибхьули) Гьа, раши, раши Сарат. Арац1и. Сен г1ях1си барри рак1ни. (Ута кабирхьули) Кари иша. Г1ях1си барри рак1ни – чудни-хинк1и дурасилра.
Г1умар Гъай камдарану чудни-хинк1и кадихьа.
Пат1имат Буссяг1ят, дила ах1ерти, буссяг1ят…
Пат1иматли чудни-хинк1и дурайсу. Лебилра к1абат1 алав кабиръур.
Г1умар (чуду-хинк1 уфбирули) Х1ябилра дуц1арли лер. Ц1аличир мага дарибтив ишди, се сари?
Пат1имат Ах1ен, дила суб, берх1илиур делхьунти сари.
Г1уммар Вях1, Сарат, х1ед чудни-хинк1и дуц1арли ах1ену?
Сарат (г1яшли) Ах1ен.
Саратли ца чуду-хинк1 бука, ца шалк1у кабирхьу.
Пат1имат Г1урра херну релкъайчи рукен.
Г1умар (шайчи) Ишичи чини хъарбарили урх1ла рурсби белкъайчи бахес. (Ахъли) Сарат, чинарах1ела итди жагати, духъяна ц1удара чурми?
Пат1имат Се дирути х1ед ишала чурми?
Г1умар (чуду-хинк1 ч1ямбирули) Ца ити хьарбиуси саби.
Пат1иматли сагаси чуду-хинк1ла к1абат1 кабирхьу. Саратли ца чуду-хинк1 бука, ца шалк1у кабирхьу.
Г1умар Рулкъихъаригу Сарат, рулкъихъари, гьалакмарик1уд. Дуц1арли сари. Х1ела лезми бигес асубирарну гьалакмарик1уд. (Пат1иматлизи) Ахъраибсигъунагу иш, ах1ену?
Пат1имат Ахъх1ераэс жагьриубси рурси сари иш.
Г1умар (тамашавиубли) Хъуц1румира дяг1удиубтигъунти сари…
Пат1имат Гьу, биурну, гьала х1еръа. Урузмаририд рурси.
Г1умар Ягъари, Сарат, гьалакмарик1удгу, чудни-хинк1и дуц1арли сарину.(Шайчи) Тамаша х1ебиалли, кьаркьайзир халараибсигъунагу иш. Х1екьли далдалкьяш ретаурли х1ериалли.
Пат1имат (рурсила бек1 х1яршбирули) Рукен, рукен, Сарат. Г1урра лерну рукен.
Саратли ца чуду-хинк1 бука, ца шалк1у кабирхьу.
Г1умар (гьандуцес х1ейубли) Алх1ям дулиллагь, х1ела урк1ец1и Аллагь! Баркалла чудни-хинк1и дарибсилисра, нушабра – деркнилис.
Лебилра абилзан.
Пат1имат гьанна рукьен, дила рурси, хъули, кьанни сабину. Эгер урми шалах1едик1алли жяг1ял дуги, г1уррара рак1и.
Сарат (г1яшли) Баркалла, дуги г1ях1си бак1аб.
Пат1имат Аралии ратаби, х1едра г1ях1си бак1аб.
Сарат дурарулхъан.
Г1умар (г1ясили) Х1ябилра вайси канила рег1 терри кьалли ит Сарат.
Пат1имат Вари, вари или майк1уд. Ит г1ях1си рурси сари.
Г1умар Г1ях1 мабак1аб сунечи. Х1ерик1ахъули, ца касайчи х1ябал дукули, х1ябал шалк1у урдирхьули, к1ел кьям чудни-хинк1ала тамандарибгу. Агь, къикъя! Агь, къикъя!
Пат1имат Селра х1ебирар, х1ялал диаб сунес.
Г1умар Илкьяйда рукух1ели сари ит ярсла т1алван халараибси, ахъраибси. Хъуц1румира дяг1удиублири… Батбихьра мурул адамлагъунари… Т1аш! Ит… Сарат ах1енри! Итала т1ама нуни балусигъуна саби. Амма, чила сабри? (Някъличи някъ бухили) Гьа, шакугира… Ит, угъраш, Х1яжи сайри!
Пат1имат (дукарк1ули) Сайри, х1ела Х1яжи сайри.
Г1умар Х1яжли укьяб сай. Агь, куппаюгъли! Агь, куппаюгъли! Т1ашизих1ед се бирисал нуни! (Ханжал касили) Т1ашизи гьари илди х1ела лих1би чердирхъисну.
Дугела ц1ябдешлизив вяв-ч1ярик1ули Г1умар виц1ур. 03.04.2000д.18с.58м.