Сегодня очень много пишут об Александре Невском. К великому сожалению, отдельные авторы падки на ложь и разного рода измышления о нём. Чтобы познать истину, предлагаю дорогому моему читателю заглянуть в первоисточник и самому во всём разобраться. Из первоисточника, то есть "Летосказания Нестора...", которое писали не только Нестор, но также игумен Сильвестр в 1111 году и другие летописцы, последний из которых, описывая события 1243 года, лично беседовал с очевидцем "Ледового побоища", я выбрал только то, что касается непосредственно Александра Невского.
Вот эти строки:
ЛЕТОСКАЗАНИЕ НЕСТОРА, ЧЕРНОРИЗЦА ФЕОДОСИЕВА МОНАСТЫРЯ ПЕЧЕРСКАГО, ОТ ЧЕГО НАЧАЛО РУСКИЕ ЗЕМЛИ И КТО В НЕЙ НАЧАЛ ПЕРВОЕ ВЛАДЕТЬ
(в книге Татищева В.Н. «История Российская». Часть вторая. Т. III. главы 19-37. стр.208-230 М. Ладомир. 1995. и Часть третья. Т.V. главы 38-56. стр.25-44 М. Ладомир. 1996.)
6727 (1219)…
Сентеврия 7-го дня…
…
(1220 – Б.П.)
Маиа 30 родился князю Ярославу сын и наречен во святом кресчении Александр…
…
6729 (1221)…
…
6736 (1228)…
…
Ярослав Всеволодич выехал из Новгорода в Переславль и с княгинею, а в Новеграде оставил два сына, Феодора и Александра, с боярином Феодором Даниловичем и судиею Якимом.
…
6738 (1230)…
…
Ярослав пришел в Новград декабря 30-го дня и, учиня в Новеграде разпорядок, оставил сынов своих Феодора и Александра, сам возвратился марта 25-го в Переславль.
…
6743 (1235)…
…
Ярослав Всеволодич, собрав новгородцов и, взяв помочь от сыновцов Константиновичев, со всеми своими переславскими войски пошел на Михаила. К Киеву идучи, область Черниговскую, где не было кому оборонять, разорял и, тяжкие откупы с городов взяв, пришел к Киеву. Сам сел на Киеве, а в Новеграде оставил сына Александра…
…
6746 (1238) Прииде князь Ярослав Всеволодич, брат великого князя Юрья Всеволодича, из Великого Новаграда в Володимер на великое княжение, а в Новгороде оставил сына своего князя Александра.
…
6747 (1239)…
…
Того же лета в Новеграде женися князь Александр Ярославич, внук Всеволож, у полоцкого князя у Брячислава поят княжну Параскевию. Того же лета князь Александр Ярославич с новгородцы сруби град на Шолоне.
…
6749 (1241)…
…
Приидоша неции от западных стран, иже нарицаются слуги божии, в Новград видети великого князя Александра Ярославича, хотяху мир сотворити. Он же отпусти я тщи.
Слышав же сия король части римския от полунощныя страны, иже первее варяги и готы, ныне свии имяновахуся, и собрав силу многу, мейстеры, бискупы, свею, мурмани и готы, и наполни корабли своя полков своих, прииде в реку Неву, начат ижору и воты пленити, хотя восприяти Ладогу, таж и Новград и всю землю Новогородскую. Напредь же посла послы своя ко Александру Ярославичю, глаголя сице: «Аще хощеши противитися ми, и се аз пришел есмь, прииди и поклонися, проси милости, и дам ти, елико хощу. Аще ли же воспротивишися, попленю и разорю всю, и порабочю землю твою, и будеши ми раб и сынове твои».
Князь же Александр Ярославич, слышав словеса сия, разгореся духом, посла воскоре вои собирати, а сам вниде в церковь святыя Софеи и паде на колена пред святым олтарем, моляся со слезами господу богу и пречистей богородице дати ему помощи. Егда же снидошася неколико от воинства, и абие всед на конь, иде противу ратных и ко отцу не успе вести послати, приближиша ибо ся ратнии; но и новгородцы мнози не успеша совокупитися, понеже воскоре изыти противу их нужда бе. И прииде на них в неделю месяца июля в 15 день.
Бе же некто от воевод Александровых старейшина в земли Ижерской, имянем Пергусий, а в крещении Филипп, ему же поручена бысть стража морская. Сей убо Пергусий виде силу ратну и иде против князя Александра Ярославича, да скажет ему многую силу варяжскую; стоявшу бо ему при краи моря, стерегущу обою пути и всю нощь во бдении пребывающу, яко же нача восходити солнце, и услыша шум странен по морю, и видев насады ратных гребуща, поиде вскоре; и срете его князь великий Александр Ярославич, он же виде его радостныма очима.
И потщався Александр, прииде на них в шестый час дни, и бысть брань крепка зело и сеча зла, и одоле супостатом, и изби многое множество их, и самому королю возложи на лице печать мечем своим.
Явиша же ся тогда в полку Александрове шесть мужей сильных и вельми храбрых, иже много одоления показаша. Первый Гаврило Олескин; сей наеха на шнеку, и виде королевича, мчаща на насад под руки, и въеха на коне по досце в воду до самого короля, по ней же исхожаху ис корабля и в корабль. Ратнии же видеша такова мужа и побежаша пред ним в корабль, и паки возвратився, свергоша его з доски и с конем в море. Он же божиим заступлением оттуду изыде неврежден и паки наехав битися с бискупом и с воеводою их посреде полку. И ту убиен бысть и бискуп их, и воевода их.
Вторый же бе новогородец Збыслав Яконович; сей на многих нахожаше и, бия, многия и паде. Третий же Яков Полочанин; сей един ежжаше на полк и много мужества показа. Четвертый же новгородец, именем Миша; сей убо пеш з дружиною своею изби три корабли ратных. Пятый от убогих бе, имянем Сава; сей, наехав великий шатер златоверхий королев и подсече столп его. Шестый же Ратмир, також от убогих; сей бися пеш и много храбрствовал, и обступиша его много ратных, он же, от многих ран пад, скончася. И избиенно бысть безчисленно римлян.
Сия же повести вся слышав от государя своего великого князя Александра Ярславича и от иных многих, бывших тогда на той битве. Егда победи корабли обопол реки Ижеры, остаток же их побежаша посрамлены, а трупия мертвых своих великих воевод наметаша три корабли и потопиша с ними в мори, а протчим ископаша ямы и вметаша их ту безчисленно; а инии мнози язвени быша. Новгородцев же на той битве паде: Костянтин Лагутишич, Ярята Пинященич, Нестер, Дрочило Гнездило кожевников сын, и всех их двадесять мужей паде и с ладожены. Князь великий же Александр Ярославич возвратися в Новград с великою победою, славя господа бога и пречистую богородицу.
…
Того же лета размолвишася новогородцы с Александром Ярославичем, и бысть крамола велика в Новегороде. И отъиде Александр скоро ко отцу своему великому князю Ярославу Всеволодичу владимирскому, и мало пребыв у отца, и иде в Переславль на княжение, иже на Клещине озере.
Того же лета немцы: медвежане, велианцы, юрьевцы со князем Ярославом Владимировичем взяша Изборск. И выидоша противу их псковичи, и победиша их немцы, и воеводу псковского Гаврила Борисовича убиша; и приидоша ко граду Пскову, и посад псковский пожгоша, и град едва не взяша. Того же лета немцы западнии воеваша Новогородския волости и град Копорью поставиша, и Тесон взяша, и гонишася за тридесять верст до Новаграда; и много зла сотвориша, и со многим полоном возвратишася восвояси, а на иных градех и дань возложиша.
Того же лета новогородцы по обычаю своему сотвориша вече и послаша с челобитьем в Володимер к великому князю Ярославу Всеволодичу, просяще у него сына его князя Александра, иже в Переславле на Клещине озере. Ярослав же даяше им сына своего князя Андрея. Они же просиша паки Александра. И иде архиепископ Спиридон из Новагорода с предними мужи к великому князю Ярославу Всеволодичу в Володимер, он же даде им сына своего князя Александра. Того же лета приходиша литва и немцы ратью в Новогородскую землю и, много зла сотвориша, отъидоша.
6750 (1242) Иде князь Александр от отца своего Ярослава к Новугороду. И пришед в Новград, многия крамольники перевеша, изыде скоро с новгородцы, и с ладожаны, и с корелою, и с ижерцы на град немецкий Копорья; и изверже град и до основания, и самих немец изби, а иных с собою приведе в Новград, а иных отпусти в свою их землю Немецкую, бе бо милостив вельми, а вожаны и чудь крамольников перевеша; и иде паки в Переяславль белоруской.
6751 (1243)
Собрашася немцы с сея страны, и приидоша ко Пскову, и полки псковския победиша, и наместников своих посадиша во Пскове. Слышав же сие князь Александр Ярославич, опечалися зело за кровь христианскую, и не умедлив нимало, но разгореся ревностию, иде к Новуграду, поим с собою брата своего Андрея и вся воинства своя. И пришед в Новград, собрав вои, поиде из Новаграда на немцы з братом своим со князем Андреем, и с новгородцы, и с низовцы в силе велицей, и заня вся пути до Пскова; и изгони безвестно град Псков, и изыма немцы, и чудь, и наместники немецкие, и окова их, посла в Новгород. И освободи Псков от плена, и землю Немецкую, шед, повоева и пожже, людей же много изби, а иных плени. Немцы же его ради в то время паки силу совокупиша и идоша с воинством своим. И яко же видеша их сторожи Александровы, и ужасошася страхом великим, видяще многу силу их, и поведаша князю Александру Ярославичу.
Он же, слышав сие, не опечалися, но вскоре иде противо има на землю Немецкую. Бе же тогда зима. И егда бысть в земли их, распусти все воинство свое в загоны. И убиша немцы в загоне воеводу Дамаша и Кербета, брата посаднича, сильных и храбрых зело, и иных многих избиша с ними, а иных руками яша, а инныя прибегоша к великому князю Александру Ярославичу; он же нача збирати. И местер прииде противо Александра со всеми пискупами и со всею силою их и с помощию королевою, и снидоша на озеро Чюцкое.
Видев же их Александр, и вспятився назад, а они по нем поидоша. Александр же постави полки своя на озере Чюцком на Узмени у Воронья камени, и ополчився, поиде противу их с помощию божиею, и наступиша озеро Чуцкое обоих множество. Со Александром же и братом его бысть много храбрых и крепких мужей, и исполнишася вси духа ратного; бе же сердце их аки львов, лехкостью же быша аки орлы, глаголюще ко Александру сице: «Се, княже господине, ныне нам приспе время положити главы своя за тя и за свою отчину». Он же воздев руце свои на небо и рече: «Не нам, господи, не нам, но имени твоему даждь славу, аз бо есмь червь, а не человек. И не помяни грехов моих, господи, но прослави имя твое и даждь нам помощь твою».
Бе же тогда день суботный, и восходящу солнцу сступишася обои полцы, и немцы пробишася свиньею сквозе полки Александровы, и бысть ту сеча зла; и бе аки гром от ломления копейного, и от звука мечнаго сечения, и от щитовнаго скепания, и кровь, аки вода, лияшеся, и нигде бе не видети леда, но всюду кровь лияшеся.
Слышах же сие от самовидца, бывшаго тогда тамо и поведаша ми (Выделено мной – Б.П.).
И побеждени быша немцы силою божиею и пречистыя его матери, и гнашася за ними по озеру, биюще их, на седмь верст до Суболиуского брега. И паде немец 500, а чюди безчисленно множество, а руками яша немец 50 нарочитых, а инии на озере истопоша, бе бо уже весна, а инии язвени отбегоша. Бысть же битва сия месяца апреля в 15 день. И тако прослави господь бог великого князя Александра Ярославича пред всеми человеки, и не обретеся ему противник в брани никогда же.
И возвратися Александр с победою в Новград, и срете его чин священнический со кресты и весь Новград, воздающе хвалу господеви, глаголюще: «Яко же пособивый господи кроткому Давиду победити иноплеменники, тако и верному князю нашему пособи побити враги наша и свободи град Псков от иноплеменников». И прослы имя Александрово по всем странам от моря Варяжского до моря Понтийского, и до моря Хвалынского, и до страны Тиверейской, и до гор Арарацких, иже об ону страну моря Хвалынского.
Того же лета прислаша немцы с поклоном в Новград, глаголюще: «Что есмя взяли копьем и мечем Псков, Ветлугу, Латыгоду, и мы ся того всего отступаем. А что есмя поимали в полон людей ваших, а теми ся разменим: мы ваших отпустим, а вы наших отпустите, и псковский полон пустили». И тако умиришася, а полон весь отпустиша обои.
Того же лета начаша Литва воевати Новгородския волости. Александр же вышед и победи их седмь ратей единою и множество их изби, а коих поимаша, вязаша их к хвостом коневим, ругающеся, ведоша их с собою. И оттуду начаша блюстися имени его.
…
6753 (1245)…
Того же лета воеваша Литва Торжок и Торопец, Бежецкие волости. И поиде за ними в погоню князь Ярослав Володимерич с новоторжцы, бысть им бой. И победиша Литва, и многих избиша, и кони поимаша, внидоша во свою землю. И паки тверской воевода Яведе и Кербет со тверичи и з дмитровцы погнаша за ними, а князь Ярослав Владимирич с новоторжцы; и бысть бой велий под Торопцом, и бияхуся весь день, и одолеваху литва, и бежаша князи в Торопец.
И той нощи прииде к ним на помощь князь Александр Ярославич с новгородцы, и бысть радость велия, и объимающе, целовахуся. И назаутрие изыдоша, ополчившеся, на литву, и бысть брань велия и сеча зла; и победиша литву, и отъяша у них полон весь. Новгородцы ж оттуду возвратишася. И погна по них князь Александр з двором своим, и би их под Жижичем, и мало их кто избежав. И сына своего взя из Витепска, и поиде к Новуграду; и стрете иную рать, и не устыдеся противу их стати, и сотвори с ними битву велию, и божиею помощию и пречистыя богородицы одоле супостатов, и прииде с радостию восвояси.
…
6755 (1247). Князь великий Ярослав Всеволодич бысть в Орде у канович, и тамо обажен бысть Феодором Яруновичем к хану Батыю. И много истомления принят от татар за землю Рускую, и отпустиша его уже изнемогша. И мало пошед от канович, и преставися нуждною смертию во иноплеменницех месяца сентября в 30 день. Сынове же его Андрей со братиею, встретивше тело его, со плачем многим погребоша во Владимире. Слышав же в Новеграде князь Александр смерть отца своего великого князя Ярослава Всеволодича, и прииде во Володимер, и плака по отцы своем з дядею своим Святославом Всеволодичем и з братиею своею.
По совещании же по смерти брата своего Ярослава Всеволодича седе на столе великом княжении в Володимере великий князь Святослав Всеволодич, а братаничи свои князя Александра, Андрея, Костянтина, Афанасия, Даниила, Михаила, Ярослава и Василия Ярославичев посажа по городом, яко же уряди брат его князь великий Ярослав Всеволодич, он же не премени слова его.
Того же лета князь Андрей Ярославич поиде во Орду к хану Батыю. Хан же прият его с честию.
Того же лета Батый посла в Новград ко Александру Ярославичу, глаголя: «Мне покорил бог многия языки, ты ли един не хощеши покоритися державе моей? Но аще хощеши ныне соблюсти землю свою, то, пришед, поклони ми ся, и узриши честь и славу царствия моего». Он же благословися у епископа Кирила, поиде во Орду. Пришедшу же ему во Орду ко Батыю, и видев его хан, рече к вельможам своим: «Яко же сказаша ми о нем, тако есть; несть кто подобен сему князю». И почтив его, и посла з братом его Андреем Ярославичем ко кановичем.
…
6756 (1248)…
…
Того же лета князь Михаило, нарицаемый Хоробрит, сын Ярославль, внук Всеволож, согна с великого княжения Святослава Всеволодича. Он же исшед. Блаженный же Кирилл, епископ ростовский, посла, взя тело его, и положиша его в церкви пречистыя Богородицы во Владимире. Андрей же со другою братиею, князи суздальстии, идоша на литву и побиша их из Оцова... Князь же Александр, слышав сия, елика сотвори брат его Михаил, прииде во Володимер. И бысть им пря велия о великом княжении. Они же уложа ити во Орду. И поидоша князи Александр, Андрей и Михаил, и многу стязанию бывшу.
6757 (1249) Даде хан великое княжение Киевское и всю землю просто Рускую князю Александру, а Белоруское князю Андрею по завету отца их.
…
Того же лета прииде князь Александр Ярославич и брат его князь Андрей от канович.
Великий же князь Андрей Ярославич сяде на великом княжении на столе отца своего, а Александр иде в Новград и оттуду хотяше итти на Киев, но отрекоша ему новогородцы татар ради. Он же остася в Новеграде, а отчины имея Переяславль белоруский…
…
6759 (1251) Преосвещенный Кирилл, митрополит киевский и всея Росии, с Кириллом, ростовским архиепископом, иде из Володимера в Новград; и стрете его с честию великою с предними мужи князь великий Александр Ярославич, таже стретоша его со кресты весь священнический собор, архимандриты и игумены, со множеством народа. И умолен быв новгородцы, и постави им епископа Далмата.
Того же лета в Новеграде разболеся князь великий Александр Ярославич, и бысть болезнь его тяшка зело, но господь бог умолен бысть о нем.
…
6760 (1252) Иде князь великий Александр Ярославич во Орду к хану Сартаку, Батыеву сыну, и прият его хан с честию. И жаловася Александр на брата своего великого князя Андрея, яко сольстив хана, взя великое княжение под ним, яко старейшим, и грады отческие ему поимал, и выходы и тамги хану платит не сполна.
Хан же разгневася на Андрея и повеле Неврюи салтану итти на Андрея и привести его перед себя. И того же лета прииде из Орды Невруй салтан, и князь Катиак, и князь Алыбуга храбрый ратью на великого князя Андрея Ярославича суздальского и на всю землю Суздальскую. Князь же великий Андрей Ярославич суздальский смутися, в себе глаголя: «Господи, что есть, доколе нам м еж собою бранитися и наводити друг на друга татар? Лутче мне збежати в чужую землю, нежели дружитися и служити татаром». И собрав воинство свое, иде против их; и сретшеся, начаша битися.
И бысть битва велия, и одолеша татарове, и побежа князь великий Андрей суздальский и с княгинею своею, и з бояры своими в Новград Великий, и оттуду иде во Псков. И тамо, дождав княгиню свою, иде изо Пскова в Колывань, и паки ис Колывани иде в Немецкую землю к Риге. И тамо местер стрете его, и прият его с великою честию. Он же и по княгиню свою посла в Колывань. А татарове гнашася за ним и постигоша его у града Переславля, иже на Клещнине озере.
Но бог сохрани его и пречистая богородица, татарове бо сугнавши его и разсовавшеся семо и овамо, он же посреди их избежа; седев на великом княжении 3 лета. Салтан же Невруй с товарыщи своими взя Переславль, иже на Клещине озере, и яша княгиню Ярославлю и з детьми, и убиша ее, а иные дети Ярославли в полон поведоша; а воеводу их Жидислава убиша, и люди вся в полон поведоша, и вся имения взяша, и идоша во Орду.
Того же лета прииде князь великий Александр Ярославич из Орды со многою честию. Преосвященный же Кирил, митрополит киевский всея Росии, срете его со кресты, и со всем освященным собором, и со множеством людей. И сяде на великом княжении в Володимире на столе отца своего Ярослава Всеволодича с пожалованием ханским, и воздвиже церкви по пленении Невруеве…
…
6763 (1255). По Велице дни светлыя недели преставися князь Константин углецкий, сын Ярославль, внук Всеволож, и понесоша тело его в Володимер. И стрете его брат его князь Александр Ярославич с митрополитом Кирилом, и со всем священным собором, и со всеми бояры своими со множеством народа, и положиша его в церкви пречистыя Богородицы владимирския.
Того же лета новгородцы взяшо изо Пскова великого князя Ярослава Ярославича тверского и посадиша его на княжение у себя в Новеграде, а князя Василия Александровича, внука Ярославля, выгнаша из Новагорода. Он же скоро посла ко отцу своему Александру Ярославичу в Володимер, а сам иде в Торжок и тамо отца своего дожда. Князь же великий Александр Ярославич з братом своим Дмитреем Святославичем Всеволодича, бе же Александр з Дмитреем двою брат дети, со многими воинствы идоша к Торжку, и стрете его сын его Василий. И оттуду идоша к Новуграду, и срете его Ретешка новогородец с Пересветом, глаголя: «Князь Ярослав Ярославич выбежа из Новограда».
Но новгородцы сотвориша вече по старому их обычаю и реша: «Братья, станем крепко за святую богородицу, и за правду новогородскую, и за свою вотчину; аще смерть, аще живот, не пощадим себя». И послаша новогородцы владыку своего Далмата с мужи своими к великому князю Александру Ярославичу, да отдаст гнев.
Он же рече ему: «Выдайте ми врага моего Ананию посадника. Аще ли не выдадите его мне, иду на вас ратью». Новогородцы же много стояще о сем. И князь великий Александр Ярославич посла к ним, глаголя: «Аще ли не выдадите врага моего Анании посадника, то отоймите у него посадничество, и аз вам гнев отдам».
Новогородцы же, собравшеся, реша к себе сия: «Здумал князь с нашими крестопреступники, и судит им бог и святая София, что князя ссаривают к нам». И взяша посадничество у Ананьи, и отдаша посадничество Михаилу Степановичу, и взяша с великим князем Александром Ярославичем мир на всей воли его, и утвердишася крестным целованием. И вниде князь Александр Ярославич в Новград, и стрете его архиепископ Далмат со кресты и со всем священным собором. И тако князь великий Александр Ярославич посади паки сына своего Василия на княжение в Новеграде, а сам иде от них из Новагорода с честию великою; и бысть мир и тишина велия.
Сего ж года возвратися князь Андрей из Немец. И прият его Александр с любовию, и хотяше ему Суздаль дати, но не смеяше царя.
6764 (1256) Поеха князь Андрей на Городец и в Новград Нижний княжити. Князь же Борис Василькович ростовский иде в Татары со многими дары. Такоже и князь Александр Ярославич посла послы своя в Татары со многими дары просити за Андрея. Князь Борис Василькович ростовский был у Улавчия и дары отдал, и честь многу прием, и Андрею прощение испроси, и возвратися со многою честию в свою отчину. Тое же зимы князь великий Александр Ярославич ходи с суздальцы на емь, и победи их, и со многим полоном возвратися восвояси.
Того же лета иде князь Александр Ярославич в Новгород с суздальцы; и оттуду иде с новгородцы на Свейскую землю и на Чудь, идоша непроходимыми месты, яко не видеша ни дни, ни нощи навсегда. И тако шедше, повоеваша все Поморие и со многим полоном и богатством безчисленным возвратишася восвояси.
6765 (1257). Идоша во Орду князь великий Александр Ярославич володимерский, и князь Борис Василькович ростовский, и князь великий Андрей Ярославич суздальский со многими дары, его же брат Александр по слову ханскому веде со собою. Хан же прият я с любовию и чествоваше у Улавчия. И возвратишася со многими честьми во своя их отчины…
…
6766 (1258)…
Того же лета приехаша численицы ис Татар в Володимер, и поехаша чиленицы ординскии в Новград, и князь великий посла от себе мужи для числения. Князь же Василий Александрович послушав злых советник новгородцев и безчествоваша численики. Они же з гневом великим, пришед к великому князю Александру, сказаша и хотяху ити во Орду.
Он же разуме беду тую, созва братию и едва упроси послы ханские. Поидоша сами с численики князь великий Александр Ярославич владимирский, и Андрей Ярославич суздальский, и князь Борис Васильевич ростовский счести Новгородския земли. Слышавше же новогородцы о сем и смутишася зело.
Пришедшим же в Новгород числеником татарским с великим князем Александром Ярославичем и с протчими князи рускими, и князь Василий Александрович новогородский побежа от отца своего из Новагорода во Псков. А татарове начаша просити дани, и не яшася по том новогородцы; и даша многи дары ханови и послом его, а их отпустиша с миром, а Михалка посадника убиша, таж и другаго посадника Михалка убиша, а Онанья посадник преставися, и даша посадничество Михалку Федоровичу, а тысяцкое даша Жидяте Доможирову.
А князь Александр Ярославич выгна сына своего Василия изо Пскова и посла его в Низ, а дружину его казни, овому нос и уши обреза, другим же очи выима и руце отсече, кто ему советовал такое сотворити. И тако злии зле погибоша, и тако численников татарских укроти и умири.
…
6767 (1259)…
Того же лета приидоша из Орды от хана численицы в Володимер, и взяша с собою великого князя Александра Ярославича владимерского, и князя Андрея Ярославича суздальского, и князя Бориса Васильковича ростовского, и идоша в Новград; и изочтоша всю землю Новогородскую и Псковскую, точию не чтоша священнического причета. И возвратишася татарове, вземше число, идоша во Орду, и бысть мир и тишина велия в Новеграде.
А князя Александра Ярославича новогородцы у себя уняша и много чествоваше его. Он же посади у них сына своего Димитрея, а сам иде к Володимеру. И пришед в Ростов, и княгиня Василиева, и князь Борис, и князь Глеб чествоваше его со многою любовию. Он же пребысть у них неколико в любви мнозе, иде во свою отчину в Володимер.
6768 (1260). Мирно бысть.
6769 (1261). Родися великому князю Александру Ярославичу сын Даниил.
…
6771 (1263)… Того же лета князь великий Александр Ярославич, внук Всеволож, иде в четвертыи во Орду к хану Беркаю и зимова тамо; разболеся вельми, и отпущен бысть на Русь, и дошед Городца, и пострижеся во святый ангельский иноческий образ и в схиму месяца ноября в 14 день, тоя же нощи и преставися. И принесоша тело его в Володимер, и положиша во церкви пречистыя Богородицы того же месяца ноября в 23 день. Положен же бысть во граде Володимере в монастыре Рождества пречистыя богородицы; княжив 10 лет.
Сынове его: Василеи, Дмитрей, Андрей, Данило московский. О великом же княжеии бысть пря братии его Андрею, иж прежде бе на великом княжении, и Ярославу тверскому, брату его меньшему. И не хотяще межи собою сваритися, послаша послы своя во Орду к хану Беркаю. Хан же повеле Ярославу к себе быти.